Luk 5:17-26 | YomNWM | STEP | Lumbu kimosi bu kaba longa, Bafalisi ayi minlongi mi mina bobobatotukila mu mala moso ma Ngalili, ma Yuda ayi ma Yelusalemi bayizavuanda vana ayi lulendo lu Pfumu lumonika mu bambevo baba balusanga Yesu.

Luke 5:17-26

(Matayi 9.1-8 ; Malako 2.1-12)

17 Lumbu kimosi bu kaba longa, Bafalisi ayi minlongi mi mina bobobatotukila mu mala moso ma Ngalili, ma Yuda ayi ma Yelusalemi bayizavuanda vana ayi lulendo lu Pfumu lumonika mu bambevo baba balusanga Yesu. 18 Zimbukila babakala batotuka, banata dikoka mu kimpoyi ^{▼▼Tala Matayi 9.2}. Batomba diluaku di kunkotisila mu nzo muingi bantula va ntuala Yesu. 19 Vayi basia baka ko diluaku di kunkotisila mu diambu di nkangu wu batu. Diawu bakumina ku mbata muanzu ayi batobudila divudumu muanzu, bosi, bakulula dikoka beni mu kiphoyi va khatitsika batu, va ntuala Yesu.

20 Yesu bu kamona minu ki batu bobo, wukamba :

—Nkundi ama, masumu maku malemvokolo.

21 Minlongi mi Mina ayi Bafalisi batona niunguta ayi bakambasana :

—Buna nani mutu wawu wuntuba mamu ma mvuezolo e ? Nani beki minsuamu lemvukil masumu ? A keti Nzambi kaka e ?

22 Vayi Yesu wuzaba mayindu mawu, ayi wuba kamba :

—Bila mbi lunyindudila bobo mu mintima mieno e ? 23 Mbi bilutidi kambu phasi mu kamba : “Masumu maku malemvokolo” voti “telama kuaku ayi diata ?” 24 Vayi muingi luzaba ti muana mutu beki lulendo va ntoto lu lemvukila masumu…

Buna wukamba dikoka :

—Minu ndikutumina : “Telema, bonga kiphoyi kiaku ayi vutuka ku nzoꞌaku !”

25 Vana vawu dikoka ditelama, va meso ma batu boso, dibongakiphoyi kiandi ayi divutuka ku nzoꞌandi. Sumbu kavutuka wulembu kembisa Nzambi.

26 Batu boso basimina, bakembisa Nzambi kutsi boma baba vayi batuba :

—Matsiminanga tumueni buabu.